Azərbaycan Respublikası Audiovizual Şurası 3 ümumölkə yerüstü radio yayımçısı lisenziyasının alınması üçün müsabiqələr elan etmişdir.

07 iyul 2022-ci il tarixində Azərbaycan Respublikası Audiovizual Şurası növbəti iclasını keçirmişdir. İclasda radio yayımı üçün yararlı olan, boş radiotezliklərin istifadəsi məsələsinə baxılmışdır.

İclasda bildirilmişdir ki, "Media haqqında" Azərbaycan Respublikası Qanununun 35.1-ci maddəsinun tələblərinə uyğun olaraq Azərbaycan Respublikasının Rəqəmsal İnkişaf və Nəqliyyat Nazirliyinin Dövlət Radiotezliklər İdarəsi ölkə üzrə mövcud olan radio-televiziya yayım stansiyalarından radio yayımın həyata keçirilməsi üçün istifadəyə yararlı radiotezliklərin siyahısını Şuraya təqdim etmişdir. Alınan bu məlumatlar əsasında Şura aparatının Audiovizual yayıma texniki nəzarət, informasiya texnologiyaları və kommunikasiya şöbəsinin və Dövlət Radiotezliklər İdarəsinin mütəxəssisləri zəruri monitorinqlər həyata keçirmiş, yoxlamalar aparmışlar.

İclasda bununla bağlı Şura üzvlərinə məlumat verilmiş, alınan məlumatlar əsasında Şura üzvləri yeni ümumölkə yerüstü radio yayımçılarının fəaliyyətinin mümkünlüyü qənaətinə gəlmişlər. Aparılan müzakirələrdən sonra yayım üçün yararlı radiotezlik resurslarından səmərəli istifadə olunmasını təmin etmək, həmçinin, ümumölkə miqyasında radio yayımında müxtəlifliyin inkişafına nail olmaq məqsədilə 3 (üç) yeni ümumölkə yerüstü radio yayımçısı lisenziyasının alınması üçün "Media haqqında" Azərbaycan Respublikası Qanununun 29.1-ci, 50.1.3-cü və 51.1-ci maddələrinin tələblərinə uyğun olaraq 13 iyul 2022-ci il tarixdən ayrı-ayrı müsabiqələrin elan edilməsi barədə qərarlar qəbul edilmişdir.