Milli Televiziya və Radio Şurası "ASAN Radio" və "CBC Sport TV"-yə lisenziya vermişdir.

8 sentyabr 2015-ci il tarixdə Milli Televiziya və Radio Şurasının növbəti iclası keçirilmişdir. İclasda Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN xidmət) ümumrespublika radio yayımı üçün, “CBC Sport” MMC-nin ümumrespublika idman televiziya kanalının yayımı üçün xüsusi razılıq (lisenziya) verilməsi barədə müraciətlərinə baxılmışdır.

Azərbaycan Respublikası Milli Televiziya və Radio Şurası tərəfindən "Televiziya və radio yayımı haqqında" Azərbaycan Respublikasının 2002-ci il 25 iyun tarixli 345-IIQ saylı Qanununun 7, 15.1-ci maddələrinin tələblərinə uyğun olaraq dövlət yayımçısı kimi Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinə Bakı şəhəri və Abşeron yarımadasında 100.0 MHs tezliyində ümumrespublika radio yayımı üçün, "CBC Sport" MMC-yə 37-ci yayım kanalında ümumrespublika idman televiziya kanalının yayımı üçün müsabiqədənkənar 6 il müddətinə xüsusi razılıq (lisenziya) verilməsi barədə qərar qəbul edilmişdir.

Eyni zamanda iclasda yayım tezliklərindən səmərəli istifadə edilməsi ilə bağlı məsələ müzakirə edilmiş, dövlət yayımçılarının və özəl yayımçılarının müvafiq olaraq 37-ci və 48-ci yayım kanallarında yerləşdirilməsi barədə qərar qəbul edilmişdir.