Azərbaycan Respublikası Audiovizual Şurası

Bəxtiyar Balakişiyev 1957-ci ildə Xocavənd rayonunda anadan olmuşdur. 1976-cı ildə Azərbaycan Dövlət Universitetinin Filologiya fakültəsinə daxil olmuşdur. 1979-1982-ci illərdə Moskva Dövlət Universitetinin jurnalistika fakültəsində təhsilini davam etdirmişdir.

1982-1989-cu illərdə “Dövlətnəşrkom”da redaktor vəzifəsində çalışmışdır. 1989-2006-cı illərdə Azərbaycan Dövlət Televiziya və Radio Verilişləri Komitəsində redaktor, şöbə müdiri və baş redaktor vəzifələrində çalışmışdır. 2006-ci ildə dövlət televiziyadakı işindən ayrılmış və müxtəlif kanallarla əməkdaşlıq etmişdir. 2010-2016-cı illərdə "Azərbaycan" qəzetində şöbə müdiri vəzifəsində çalışmışdır.

2014-2015-ci illərdə Azərbaycan Respublikası Nazirlər Kabineti yanında Qarabağ münaqişəsi ilə əlaqədar yaradılan İtki və Tələfatların Hesablanması üzrə İşçi Qrupunun üzvü kimi fəaliyyət göstərmişdir. 2016-2017-ci illərdə "Azərbaycan Televiziya və Radio Verilişləri" QSC-də "Mədəniyyət TV" kanalının direktor müavini vəzifəsində işləmişdir. 2019-cu ilin fevralın 1-dən "Azərbaycan Televiziya və Radio Verilişləri" QSC-də yeni yaradılan Müəllif proqramları və xüsusi layihələr departamentinin rəhbəri təyin edilmişdir.

Bəxtiyar Balakişiyev 12 mart 2019-cu il tarixdən Azərbaycan Respublikası Milli Televiziya və Radio Şurasının üzvü təyin edilmiş, Azərbaycan Respublikası Prezidentinin 08 fevral 2022-ci il tarxli 1589 nömrəli Fərmanın 4.2-ci yarımbəndinə əsasən Milli Televiziya və Radio Şurasının səlahiyyət müddəti bitməmiş üzvü kimi 2025-ci ilədək fəaliyyətini Azərbaycan Respublikası Audiovizual Şurasında davam etdirmişdir.

Azərbaycan Respublikası Prezidentinin 08 oktyabr 2025-ci il tarixli Sərəncamı ilə Bəxtiyar Balakişiyev yenidən Azərbaycan Respublikası Audiovizual Şurasının üzvü təyin edilmişdir.

Bəxtiyar Balakişiyev Azərbaycanda milli mətbuatın inkişafında xidmətlərinə görə 2010-cu ildə "Tərəqqi" medalı, 2025-ci ildə isə “Əməkdar jurnalist” fəxri adı ilə təltif edilmişdir. Azərbaycan Yazıçılar Birliyinin və Azərbaycan Jurnalistlər Birliyinin üzvüdür. "Meteor yağışları", "Yerlə göy arasında", "İstiqlal düşüncələri" kitablarının, çoxsaylı məqalələrin, bədii və sənədli filmlərin müəllifidir.

Telli Pənah qızı Əliyeva 1954-cü ildə Qərbi Azərbaycanın (hazırki Ermənistan Respublikası) Vedibasar rayonunda anadan olmuşdur. 1971-1976-cı illərdə Azərbaycan Dövlət Universitetinin Jurnalistika fakültəsində təhsil almışdır.

1977-1980-ci illərdə C.Cabbarlı adına Respublika Gənclər Kitabxanasında baş kitabxanaçı, 1980-1981-ci illərdə Azərbaycan Dövlət Televiziya və Radio Verilişləri Komitəsində müxbir, 1981-1982-ci illərdə Azərbaycan Dövlət Televiziyasının Gənclik redaksiyasında kiçik redaktor, 1982-1992-ci illərdə Dövlət Televiziyasının İctimai-siyasi və iqtisadi informasiyalar redaksiyasında redaktor,1992-1993-cü illərdə Dövlət Televiziyasının İnformasiya studiyasının "Günün ekranı" Yaradıcılıq Birliyi rəhbərinin müavini, 1993-1995-ci illərdə "Azərbaycan Dövlət Teleradio Şirkəti"nin İnformasiya xidməti rəhbəri, 1995-1997-ci illərdə Televiziyanın İkinci Proqram üzrə direktoru, 1997-2005-ci illərdə İkinci Proqram üzrə Baş proqram direktorunun müavini, 2005-ci ildən isə "Azərbaycan Televiziya və Radio Verilişləri" QSC Televiziya Proqramları direktorunun müavini vəzifələrində işləmişdir.

2021-2025-ci illərdə isə "Azərbaycan Televiziya və Radio Verilişləri" QSC-nin nəzdində fəaliyyət göstərən Teleradio Akademiyasının rektoru olmuşdur.

Telli Əliyeva 12 mart 2019-cu il tarixdən Azərbaycan Respublikası Milli Televiziya və Radio Şurasının üzvü təyin edilmiş, Azərbaycan Respublikası Prezidentinin 08 fevral 2022-ci il tarxli 1589 nömrəli Fərmanın 4.2-ci yarımbəndinə əsasən Milli Televiziya və Radio Şurasının səlahiyyət müddəti bitməmiş üzvü kimi 2025-ci ilədək fəaliyyətini Azərbaycan Respublikası Audiovizual Şurasında davam etdirmişdir.

Azərbaycan Respublikası Prezidentinin 08 oktyabr 2025-ci il tarixli Sərəncamı ilə Telli Əliyeva yenidən Azərbaycan Respublikası Audiovizual Şurasının üzvü təyin edilmişdir.

Telli Əliyeva milli mətbuatın və mədəniyyətin inkişafında xidmətlərinə görə 2006-ci ildə “Əməkdar mədəniyyət işçisi” fəxri adı, 2008-ci ildə "Tərəqqi" medalı və 2024-cü ildə “2-ci dərəcəli Vətənə Xidmət” ordeni ilə təltif edilmişdir. O, müxtəlif illərdə "Qızıl qələm", "Həsən bəy Zərdabi", "Məmməd Araz", "Natəvan" mükafatlarına layiq görülmüşdür. "Ali Media mükafatı” laureatıdır. Telli Əliyeva 4-ü şeir kitabı olmaqla 10 kitab müəllifidir. Azərbaycan Yazıçılar Birliyinin və Azərbaycan Jurnalistlər Birliyinin üzvüdür.

Aslan Xası oğlu Xəlilov 1962-ci ildə Şamaxı rayonunda anadan olmuşdur. 1982-1985-ci illərdə Bakı Dövlət Universitetinin tarix fakültəsində təhsil almışdır. 1985-1988-ci illərdə Moskva Dövlət Universitetinin tarix fakültəsində təhsilini davam etdirmişdir.

1989-cu ildən 2003-cü ilədək Bakı Slavyan Universitetinin tarix kafedrasında əvvəlcə müəllim, baş müəllim vəzifəsində çalışmışdır. 2003-cü ildən dosent vəzifəsində çalışır. 2018-ci ildən tarix elmləri doktorudur.

2003-ci ildə Azərbaycan Respublikası Prezidentinin sərəncamı ilə 2 il müddətinə Milli Televiziya və Radio Şurasının üzvü təyin edilmişdir. 2005-ci, 2011-ci və 2017-ci illərdə Azərbaycan Respublikası Prezidentinin müvafiq sərəncamları ilə 6 il müddətinə Milli Televiziya və Radio Şurasının üzvü təyin edilmiş, Azərbaycan Respublikası Prezidentinin 08 fevral 2022-ci il tarxli 1589 nömrəli Fərmanın 4.2-ci yarımbəndinə əsasən Milli Televiziya və Radio Şurasının səlahiyyət müddəti bitməmiş üzvü kimi 2023-cü ilədək fəaliyyətini Azərbaycan Respublikası Audiovizual Şurasında davam etdirmişdir.

Azərbaycan Respublikası Prezidentinin 14 aprel 2023-cü il tarixli Sərəncamı ilə Aslan Xəlilov Azərbaycan Respublikası Audiovizual Şurasının üzvü təyin edilmişdir.

1996-cı ildə "1917-1920-ci illərdə Zaqafqaziyanın müsəlman əhalisinə qarşı soyqırımı tarixi mənbələrdə" mövzusunda dissertasiya müdafiə edərək tarix üzrə fəlsəfə doktoru elmi adını almışdır. Bu əsər milli tarixşünaslığımızda, 1917-1920-ci illərdə Cənubi Qafqazın müsəlman əhalisinə qarşı erməni dövlət təşkilatları tərəfindən həyata keşirilmiş kütləvi qırğınları soyqırımı kimi qiymətləndirən ilk dissertasiyadır. Həmin dissertasiya əsasında, 2000-ci ildə rus dilində nəşr edilmiş eyniadlı kitab ABŞ Konqresinin kitabxanasında, ABŞ-da yerləşən Holokost Memorial Muzeyində və dünyanın bir sıra aparıcı ölkələrinin kitabxanalarında saxlanılır.

Azərbaycan Respublikası Prezidentinin 21 iyul 2025-ci il tarixli Sərəncamına əsasən Azərbaycanda milli mətbuatın inkişafında xidmətlərinə görə “Tərəqqi” medalı ilə təltif olunmuşdur. 2 monoqrafiya və 60-dan yuxarı elmi və elmi-publisistik məqalənin müəllifidir.

İsa Rəhman oğlu Məmmədov 1953-cü ildə Lənkəran rayonunda anadan olmuşdur. 1970-ci ildə Azərbaycan Politexnik İnstitutunun "Elektrotexnika" fakultəsinin birinci kursuna daxil olmuş və 1975-ci ildə həmin institutu bitirərək, "Radiorabitəsi və radioverilişi" ixtisası üzrə mühəndis adını almışdır.

Əmək fəaliyyətimə 1976-cı ildə Azərbaycan SSR Rabitə Nazirliyinin "Respublika Radio-Televiziya Verici Mərkəzi"ndə başlamış, əvvəlcə böyük elektromexanik, 1977-ci ildən isə mühəndis vəzifəsində çalışmışdır.

İsa Məmmədov Azərbaycan xalqının Ümummilli lideri Heydər Əliyevin təşəbbüsü ilə Moskva Elektrotexniki Rabitə İnstitutunun məqsədli əyani aspiranturasına göndərilmiş, 1978-ci ildə əyani aspiranturaya daxil olmuş və 1982-ci ildə bu institutun aspiranturasını bitirirərək, texnika elmləri namizədi elmi dərəcəsini almışdır. 2002-ci ildə Odessa Milli Rabitə Akademiyasında doktorluq dissertasiyasını müdafiə etmişdir. Azərbaycan Respublikası Prezidenti yanında Ali Attestasiya Komissiyasının 19 mart 2010-cu il tarixli qərarı ilə İsa Məmmədova professor elmi adı verilmişdir.

1983-cü ildən başlayaraq Azərbaycan Politexnik İnstitutunda (indiki Azərbaycan Texniki Universitetində) assistent, baş müəllim, dosent və professor vəzifələrində çalışır. 1996-2005-ci illərdə Azərbaycan Texniki Universitetində vaxtaşırı kafedra müdiri və dekan kimi fəaliyyət göstərmiş, paralel olaraq 1997-2003-cü illərdə Azərbaycan Dövlət Dəniz Akademiyasının "Gəmi radioavadanlığı" kafedrasının müdiri olmuşdur.

Milli Televiziya və Radio Şurasında Texniki şöbənin rəisi (2004-2008), Maliyyə və texniki nəzarət şöbəsinin müdirinin müavini (2008-2021), Maliyyə və texniki nəzarət şöbəsinin müdiri (2021-2022) vəzifələrində işləmişdir. 25 aprel 2022-ci ildən Azərbaycan Respublikası Audiovizual Şurasının Audiovizual yayıma texniki nəzarət və informasiya texnologiyaları şöbəsinin müdiri vəzifəsində çalışmışdır.

Azərbaycan Respublikası Prezidentinin 14 aprel 2023-cü il tarixli Sərəncamı ilə Azərbaycan Respublikası Audiovizual Şurasının üzvü təyin edilmişdir.

İsa Məmmədov müxtəlif ictimai və elmi vəzifələr (1985-90-cı illərdə "Radiotexnika, Elektrotexnika və Rabitə" istiqaməti üzrə Azərbaycan Texniki Universitetində nəşr olunan elmi əsərlər məcmuəsinin məsul katibi, Azərbaycan Respublikası Rabitə Nazirliyinin Texniki Şurasının üzvü, 1997-ci ildən 2013-cü ilə kimi Azərbaycan Respublikası Təhsil Nazirliyinin Elmi-Metodiki Şurasının "Elektronika və rabitə" bölməsinin sədrinin müavini, Azərbaycan Dövlət Dəniz Akademiyasının Elmi Şurasının üzvü, Azərbaycan Texniki Universitetinin Elmi Şurasının üzvü, Azərbaycan Texniki Universitetinin nəzdində olan ixtisaslaşdırılmış doktorluq şurasının üzvü, onun elmi seminarının sədri, ixtisaslaşdırılmış doktorluq elmi şurasının sədrinin müavini, Azərbaycan Respublikası Prezidenti yanında Ali Attestasiya Komissiyasının Ekspert Şurasının Elmi katibi) daşımış və daşımaqdadır.

2016-cı ildə "Əməkdar mühəndis" fəxri adı ilə təltif edilmişdir. İsa Məmmədov bir sıra kitab, çoxlu sayda monoqrafiya və məqalənin müəllifidir.

Mübariz Ağalı oğlu Əsgərov 1962-cı ildə Ucar şəhərində anadan olmuşdur. Orta təhsilini və hərbi xidməti başa vurandan sonra 1986-cı ildə Bakı Dövlət Universitetinin Jurnalistika fakültəsinə daxil olmuş, sonradan təhsilini davam etdirmək üçün Moskva Dövlət Universitetinin Jurnalistika fakültəsinə göndərilmişdir. 1992-cı ildə həmin ali məktəbi fərqlənmə diplomu ilə bitirmişdir.

1992-cı ildə Azərbaycan Dövlət Televiziyasında işə başlamış, böyük redaktor və bədii-eksperimental qrupun rəhbəri vəzifələrində çalışmışdır. Həmin illərdə "Və...", "Qulp" proqramlarının müəllifi və aparıcısı olmuşdur. 1998-ci ildən "ANS" müstəqil televiziya şirkətində aparıcı redaktor, müəllif proqramları bürosunun rəhbəri, baş prodüser vəzifələrində çalışmışdır. "ANS" televiziya kanalında yayımlanan "Qulp", "Mübarizə" proqramlarının müəllifi və aparıcısı olmuşdur. 2013-cü ildən "Qulp studio" MMC-nin təsisçisi və direktoru, "Rezonans" proqramının müəllifi olmuşdur.

Azərbaycan Respublikası Prezidentinin 29 aprel 2021-ci il tarixli Sərəncamına əsasən Mübariz Əsgərov 6 il müddətinə Azərbaycan Respublikası Milli Televiziya və Radio Şurasının üzvü təyin edilmişdir. Azərbaycan Respublikası Prezidentinin 08 fevral 2022-ci il tarxli 1589 nömrəli Fərmanın 4.2-ci yarımbəndinə əsasən Milli Televiziya və Radio Şurasının səlahiyyət müddəti bitməmiş üzvü kimi müddət bitənədək fəaliyyətini Azərbaycan Respublikası Audiovizual Şurasında davam etdirir.

2015-ci ildə "Əməkdar jurnalist" fəxri adına layiq görülmüşdür. "Bir mətbuat konfransının tarixi", "Şuşanın dağları qara dumanlı", "Xocalı dərsi", "Ölüm hökmü – ömürlük cəza", “Kəlbəcərin son günü”, “Xocalı nişanəsi”, “44 gün, 44 an”, “Şuşa”, “Qara tale – ağ ölüm” adlı sənədli filmlərin müəllifidir.

Şura üzvləri